सात देशांत फराळ व भेटवस्तू पाठविण्याची सुविधा; भारतीय डाक विभागाचे आवाहन
कोल्हापूर : दिवाळीनिमित्त घरगुती फराळ, मिठाई, भेटवस्तू आणि स्नेहाच्या शुभेच्छा देशाच्या विविध भागांसह परदेशात राहणाऱ्या प्रियजनांपर्यंत पोहोचविण्यासाठी भारतीय डाक विभागाने नागरिकांना टपाल सेवांचा लाभ घेण्याचे आवाहन केले आहे. कोल्हापूर येथील रेल्वे स्टेशनवरील RMS/BPC पोस्ट ऑफिसमध्ये 24 तास पार्सल बुकिंगची सुविधा उपलब्ध असून, नागरिकांना आपल्या सोयीनुसार पार्सल बुक करता येणार आहे.
देशांतर्गत पार्सल सेवेद्वारे महाराष्ट्रासह देशातील विविध राज्यांमध्ये दिवाळीचा फराळ, भेटवस्तू आणि इतर पात्र वस्तू पाठविता येतात. तसेच परदेशात वास्तव्यास असलेल्या नातेवाईकांना व मित्रपरिवाराला दिवाळीच्या शुभेच्छांसह भेटवस्तू पाठविण्यासाठी आंतरराष्ट्रीय पार्सल बुकिंगची सुविधाही उपलब्ध आहे. आंतरराष्ट्रीय पार्सल पाठविताना संबंधित देशाचे आयात नियम, खाद्यपदार्थांवरील निर्बंध आणि भारतीय डाक विभागाच्या अटींची माहिती घेऊनच बुकिंग करावे.
दिवाळीच्या काळात पार्सल पाठविण्यासाठी होणारी गर्दी आणि वेळेची अडचण लक्षात घेता, कोल्हापूर RMS पोस्ट ऑफिसमधील 24 तास बुकिंग सुविधेचा नागरिकांनी लाभ घ्यावा. व्यापारी, व्यावसायिक, गृहउद्योग चालक, महिला बचत गट आणि फराळ उत्पादकांनाही आपल्या उत्पादनांची देशभरात तसेच परदेशात पाठवणी करण्यासाठी या सेवेचा उपयोग करता येणार आहे. भारतीय डाक विभागाच्या माध्यमातून घरगुती फराळ आणि भेटवस्तू प्रियजनांपर्यंत पोहोचविण्याचे आवाहन रेल मेल सेवा अधीक्षक गुरुदास मोंडे यांनी केले आहे.
आंतरराष्ट्रीय पार्सलचे दर :
युएसए- 2 किलोसाठी- 2083, 5 किलोसाठी – 5510, 10 किलोसाठी -9050, 15 किलोसाठी – 12590
युके- 2 किलोसाठी- 1387, 5 किलोसाठी – 4337, 10 किलोसाठी -6461, 15 किलोसाठी – 8585
जर्मनी- 2 किलोसाठी- 1440, 5 किलोसाठी – 3988, 10 किलोसाठी -5876, 15 किलोसाठी – 7764
युएई/ दुबई – 2 किलोसाठी- 1982, 5 किलोसाठी – 2548, 10 किलोसाठी -3492, 15 किलोसाठी – 4436
ऑस्ट्रेलिया- 2 किलोसाठी- 2538, 5 किलोसाठी – 6485, 10 किलोसाठी -11913, 15 किलोसाठी – 17341
सिंगापूर- 2 किलोसाठी- 908, 5 किलोसाठी – 2844, 10 किलोसाठी -4378, 15 किलोसाठी – 5912
रशिया- 2 किलोसाठी- 1669, 5 किलोसाठी – 3918, 10 किलोसाठी -6750, 15 किलोसाठी – 9682
2 किलोचे ITPS सेवेव्दारे व 5,10 व 15 किलोचे पार्सल EMS सेवेव्दारे पाठवण्यात येणार आहे.
अधिक माहितीसाठी सचिन गायकवाड, मार्केटिंग एक्झिक्युटिव्ह, कोल्हापूर RMS/BPC पोस्ट ऑफिस, रेल्वे स्टेशन, कोल्हापूर–416001 यांच्याशी मोबाईल : 9579096100/9921834177 किंवा कार्यालयीन दूरध्वनी : 0231-2657400/2655222 वर संपर्क साधावा.
