मुंबई : सणासुदीच्या काळात अन्नधान्य, भाजीपाला आणि इतर जीवनावश्यक वस्तूंच्या वाढत्या किमतींमुळे सर्वसामान्यांच्या खर्चात वाढ झाली असतानाच आता गॅस सिलेंडरच्या दरातही मोठी वाढ करण्यात आली आहे. ऑक्टोबरच्या पहिल्याच दिवशी तेल कंपन्यांनी १९ किलो वजनाच्या कमर्शियल एलपीजी सिलेंडरच्या किमतीत ६२.५० रुपयांची वाढ केली आहे.
नवीन दरानुसार राजधानी दिल्लीत कमर्शियल एलपीजी सिलेंडरची किंमत ६२.५० रुपयांनी वाढून २ हजार ८१० रुपये झाली आहे. हॉटेल, रेस्टॉरंट आणि व्यावसायिक आस्थापनांमध्ये या सिलेंडरचा मोठ्या प्रमाणावर वापर केला जात असल्याने या दरवाढीचा परिणाम व्यावसायिकांच्या खर्चावर होण्याची शक्यता आहे.
दरम्यान, घरगुती एलपीजी सिलेंडरच्या किमतीत कोणताही बदल करण्यात आलेला नाही, ही सर्वसामान्यांसाठी दिलासादायक बाब आहे. सध्या १४.२ किलो वजनाच्या घरगुती एलपीजी सिलेंडरची किंमत मुंबईत ९४१.५० रुपये, दिल्लीत ९४२ रुपये, चेन्नईत ९५७.५० रुपये, तर कोलकात्यात ९६८ रुपये आहे. कमर्शियल सिलेंडरच्या दरवाढीमुळे सणासुदीच्या काळात हॉटेल, खानावळ आणि खाद्यपदार्थांच्या व्यवसायाच्या खर्चात वाढ होऊन त्याचा परिणाम ग्राहकांच्या खिशावर होण्याची शक्यता व्यक्त केली जात आहे.
