या खरेदीमध्ये आधुनिक तोफा, लष्करी वाहने, हेलिकॉप्टर, टेहळणी आणि हल्ला करणारे ड्रोन, ड्रोनविरोधी यंत्रणा, क्षेपणास्त्रांपासून संरक्षण करणारी उपकरणे तसेच हवामानाचा अचूक अंदाज देणाऱ्या रडारचा समावेश आहे. विशेष म्हणजे, प्रस्तावित खरेदीपैकी सुमारे ८२ टक्के खरेदी भारतीय उद्योगांकडून केली जाणार आहे. त्यामुळे देशांतर्गत संरक्षण उत्पादन क्षेत्राला मोठी चालना मिळण्याची अपेक्षा आहे. संरक्षण मंत्रालयाने तिन्ही सैन्यदलांच्या स्वतंत्र गरजा लक्षात घेऊन या प्रस्तावांना मंजुरी दिली आहे. या उपकरणांचा वापर युद्धभूमीवरील कारवायांसोबतच सैनिकांची वाहतूक, सीमावर्ती भागांतील टेहळणी, बचावकार्य आणि दुर्गम भागांमध्ये लष्करी हालचालींसाठीही होणार आहे.
लष्करासाठी आधुनिक तोफा, वाहने आणि ड्रोन
लष्कराची क्षमता वाढविण्यासाठी आधुनिक लष्करी वाहने, स्वयंचलित तोफा, शत्रूच्या गोळीबाराचे ठिकाण शोधणारी यंत्रणा, हलकी हेलिकॉप्टर आणि ड्रोनविरोधी प्रणाली यांसारखी उपकरणे खरेदी केली जाणार आहेत. आधुनिक लष्करी वाहनांमुळे डोंगराळ आणि दुर्गम भागांत सैनिक, शस्त्रास्त्रे व अन्य साहित्याची वाहतूक करणे सोपे होईल. स्वयंचलित तोफांमुळे तोफखान्याची ठिकाणे वेगाने बदलता येतील. तसेच, शत्रूने कोणत्या ठिकाणाहून गोळीबार केला, याचा शोध घेणाऱ्या यंत्रणेमुळे प्रत्युत्तर देण्याची क्षमता अधिक प्रभावी होईल.
Amaron
हलकी हेलिकॉप्टर सैनिकांची वाहतूक, टेहळणी आणि बचावकार्यासाठी उपयुक्त ठरणार आहेत. ड्रोनविरोधी यंत्रणेमुळे शत्रूच्या मानवरहित विमानांपासून निर्माण होणारा धोका ओळखून त्यांचा प्रतिकार करता येईल. याशिवाय, टेहळणी आणि हल्ल्यांसाठी वापरल्या जाणाऱ्या ड्रोनमुळे शत्रूच्या हालचालींवर लक्ष ठेवणे आणि लक्ष्यांची माहिती मिळवणे अधिक सुलभ होईल.
नौदलासाठी युद्धनौकांच्या संरक्षणावर भर
नौदलासाठी क्षेपणास्त्रांपासून युद्धनौकांचे संरक्षण करणाऱ्या आधुनिक यंत्रणांचा समावेश खरेदी प्रस्तावांमध्ये आहे. शत्रूने डागलेल्या जहाजविरोधी क्षेपणास्त्रांना दिशाभूल करून युद्धनौकेपासून दूर वळविण्यासाठी या यंत्रणांचा उपयोग होणार आहे. याशिवाय, आधुनिक युद्धनौकांच्या समावेशामुळे समुद्रातील लष्करी मोहिमा अधिक प्रभावीपणे राबविण्यास मदत होईल. स्वदेशी तंत्रज्ञानाच्या आधारे युद्धनौकांची रचना आणि निर्मिती करण्यावरही भर दिला जाणार आहे.
हवाई दलाच्या युद्धक्षमतेत वाढ
हवाई दलासाठी हेलिकॉप्टर, आधुनिक शस्त्रास्त्रे आणि हवाई संरक्षण प्रणालींच्या खरेदीला मंजुरी देण्यात आली आहे. या उपकरणांमुळे सैनिक आणि आवश्यक साहित्याची वाहतूक करण्यासोबतच हवाई मार्गाने निर्माण होणाऱ्या धोक्यांचा सामना करण्याची क्षमता वाढेल. याशिवाय, डॉप्लर रडारमुळे सीमावर्ती भागांतील हवामानाची अधिक अचूक माहिती मिळण्यास मदत होणार आहे. त्यामुळे हवाई मोहिमांचे नियोजन आणि अंमलबजावणी अधिक प्रभावीपणे करता येईल.
स्वदेशी संरक्षण उद्योगाला मोठी संधी
एकूण खरेदीपैकी सुमारे ८२ टक्के हिस्सा भारतीय उद्योगांकडून पूर्ण करण्याचे नियोजन असल्याने देशातील संरक्षण साहित्य निर्मिती क्षेत्राला मोठी संधी मिळणार आहे. स्वदेशी कंपन्यांचा सहभाग वाढल्यामुळे देशांतर्गत उत्पादनाला चालना मिळण्यासोबतच संरक्षण क्षेत्रातील परदेशावरील अवलंबित्व कमी करण्याच्या प्रयत्नांनाही बळ मिळू शकते.
