भाजपचा खरगेंवर पलटवार
खरगे यांच्या वक्तव्यावर भाजपने जोरदार प्रत्युत्तर दिले. केंद्रीय गृहमंत्री अमित शाह यांनी खरगे यांनी सर्व मर्यादा ओलांडल्याचा आरोप केला. २०१४ पासून सातत्याने होत असलेल्या निवडणुकीतील पराभवांमुळे काँग्रेसमध्ये निराशा निर्माण झाल्याची टीका त्यांनी केली. अमित शाह यांनी ‘एक्स’वरील (X) पोस्टमध्ये हिंदीत म्हटले की, “काँग्रेस पक्षाने मोदीजी किंवा त्यांच्या कुटुंबीयांबाबत अपमानास्पद भाषा वापरण्याची ही पहिलीच वेळ नाही. कधी त्यांनी मोदीजींच्या पूजनीय मातेसंदर्भात अपमानास्पद वक्तव्ये केली, तर कधी त्यांना ‘मौत का सौदागर’ (मृत्यूचा व्यापारी) असे संबोधले. काही वेळा त्यांच्या साध्या पार्श्वभूमीची खिल्ली उडवत त्यांना ‘चायवाला’ म्हटले. राहुल गांधी यांच्या नेतृत्वाखाली काँग्रेस पक्ष दिवसेंदिवस असभ्यतेच्या सर्व मर्यादा ओलांडत आहे.”
पुढे शाह म्हणाले, “गेल्या १२ वर्षांत सलग निवडणुकीतील पराभवांना सामोरे गेल्यामुळे काँग्रेस पक्ष निराशा आणि हताशेच्या गर्तेत अडकला आहे. त्यामुळे त्यांच्याकडे आता सुसंगत धोरण किंवा ठोस मुद्दे उरलेले नाहीत. केवळ अपमानास्पद वक्तव्यांचे राजकारण सुरू आहे. जनतेचा पाठिंबा आधीच गमावलेली काँग्रेस आता स्वतःच्या पक्षातील कार्यकर्त्यांमधीलही पकड गमावत आहे.”
