कोल्हापूर : सध्या निर्माण झालेल्या दुष्काळसदृश परिस्थितीची गंभीरता लक्षात घेऊन,आदिशक्ती महिला बहुउद्देशीय संस्थेच्या वतीने सोमवार ( दि.५) रोजी आयोजित करण्यात आलेल्या झिम्मा-फुगडी स्पर्धा रद्द करण्याचा निर्णय घेण्यात आला आहे, अशी माहिती संस्थेच्या अध्यक्षा वेदांतिका धैर्यशील माने यांनी दिली.
यावेळी सौ. माने म्हणाल्या, झिम्मा-फुगडी हा महिलांच्या आनंदाचा उत्सव आहे.मात्र, बळीराजा संकटात असताना उत्सव साजरा करण्याऐवजी संकटग्रस्त शेतकरी कुटुंबांच्या पाठीशी ठामपणे उभे राहणे हीच आपली सामाजिक बांधिलकी आहे.
यंदाच्या खरीप हंगामात पावसाने ओढ दिल्याने आणि पावसात पडलेल्या दीर्घ खंडामुळे शेतीवर प्रतिकूल परिणाम झाला आहे. पिके करपून गेल्याने शेतकरी बांधव मोठ्या आर्थिक अडचणीत सापडले आहेत. अशा बिकट परिस्थितीत मनोरंजनाचे कार्यक्रम आयोजित करणे योग्य ठरणार नाही. आदिशक्ती महिला बहुउद्देशीय संस्था नेहमीच महिलांच्या कला-संस्कृतीला व्यासपीठ देते. परंतु, सामाजिक संवेदनशीलतेचे भान जपत यंदाची स्पर्धा रद्द करण्यात आली आहे.या संकटातून शेतकरी बांधवांची लवकर सुटका व्हावी आणि राज्यात समाधानकारक पाऊस होऊन परिस्थिती पूर्वपदावर यावी,अशी सदिच्छाही या वेळी व्यक्त करण्यात आली.
