गुजरातमधील स्थानिक स्वराज्य संस्थांच्या निवडणुकांमध्ये भाजपने मिळवलेल्या यशानंतर शाह यांनी पत्रकार परिषदेत काँग्रेसच्या निवडणूक कामगिरीवर प्रश्नचिन्ह उपस्थित केले. गांधीनगर महानगरपालिकेच्या ४४ जागांपैकी भाजपने ३८ जागा जिंकल्या, तर थारा आणि ओखा नगरपालिकांमध्येही पक्षाने बहुमत मिळवले. अमित शाह म्हणाले, “SIR प्रक्रिया २०२४ नंतरच सुरू झाली. तुम्ही काँग्रेसचे प्रमुख नेते बनल्यापासून, त्यानंतर पक्षाचे अध्यक्ष आणि लोकसभेतील विरोधी पक्षनेते झाल्यापासून काँग्रेसला सातत्याने निवडणुकांमध्ये पराभवाचा सामना करावा लागला आहे.”
‘त्रिपुरात ३३ वर्षांपासून काँग्रेसचा मुख्यमंत्री नाही’
काँग्रेसच्या दीर्घकालीन निवडणूक पराभवांचा उल्लेख करत अमित शाह यांनी राहुल गांधी यांना आत्मपरीक्षण करण्याचा सल्ला दिला. “त्रिपुरामध्ये गेल्या ३३ वर्षांत काँग्रेसचा एकही मुख्यमंत्री निवडून आलेला नाही. पश्चिम बंगालमध्ये काँग्रेसला ५४ वर्षांपासून विजय मिळवता आलेला नाही. पश्चिम बंगाल, त्रिपुरा आणि गुजरातसारख्या राज्यांमध्ये काँग्रेसला तीन, चार किंवा पाच दशकांपासून पराभवाचा सामना करावा लागत आहे. मग या पराभवांचे कारण SIR आहे का, असा प्रश्न मला राहुल गांधी यांना थेट विचारायचा आहे. SIR प्रक्रिया तर २०२४ नंतर सुरू झाली,” असे शाह म्हणाले. राहुल गांधी काँग्रेसचे प्रमुख नेते झाल्यापासून पक्षाला निवडणुकांमध्ये पराभवाला सामोरे जावे लागत असल्याचा दावाही त्यांनी केला.
पोटनिवडणुकांमधील विजयाचा भाजपकडून उल्लेख
पश्चिम बंगाल, तामिळनाडू आणि पुद्दुचेरीमधील पोटनिवडणुकांमध्ये भाजप आणि मित्रपक्षांना मोठे यश मिळाल्याचा दावा अमित शाह यांनी केला. शाह यांच्या म्हणण्यानुसार, नौगावमध्ये भाजपच्या उमेदवाराने १ लाख ४२ हजार मतांच्या फरकाने विजय मिळवला आणि काँग्रेसकडून ही जागा जिंकली. नंदीग्राममध्ये भाजपच्या उमेदवाराला ७६ टक्के मते मिळाली आणि त्यांनी १ लाख २२ हजार मतांची आघाडी घेतली. पश्चिम बंगालमधील रेजिनगरमध्ये भाजपने तृणमूल काँग्रेसकडून जागा हिसकावून घेत ७५ हजारांहून अधिक मतांनी विजय मिळवल्याचेही शाह यांनी सांगितले. पुद्दुचेरीमध्ये भाजपच्या मित्रपक्ष असलेल्या AINRC च्या उमेदवाराने ८,४८२ मतांनी विजय मिळवला, तर काँग्रेसला केवळ २२ टक्के मते मिळाल्याचा दावा त्यांनी केला.
मुख्य निवडणूक आयुक्तांविरोधातील आंदोलन सुरूच ठेवणार : राहुल गांधी
दरम्यान, अमित शाह यांच्या वक्तव्याच्या काही वेळ आधी राहुल गांधी आणि इंडिया आघाडीच्या खासदारांनी संयुक्त पत्रकार परिषद घेऊन मुख्य निवडणूक आयुक्त ज्ञानेश कुमार आणि भाजपवर टीका केली. देशातील लोकशाही प्रक्रिया पूर्ववत करण्यासाठी आपला संघर्ष सुरूच राहील, असा निर्धार राहुल गांधी यांनी व्यक्त केला. SIR प्रक्रियेतील कथित अनियमिततांवरून त्यांनी ज्ञानेश कुमार यांच्या राजीनाम्याची मागणी केली आहे.
राहुल गांधी म्हणाले, “काहीही झाले, कोणतीही संस्था या प्रक्रियेत सहभागी झाली किंवा नाही झाली, तरी राजकीय प्रतिकार सुरूच राहील. जनतेचा प्रतिकारही सुरू राहील आणि अखेरीस त्याचा विजय होईल.” या पत्रकार परिषदेत ऑल इंडिया स्टुडंट्स असोसिएशनच्या (AISA) प्रमुख नेहा बोरा याही सहभागी झाल्या होत्या. भाजपला लोकशाही आणि संविधानाशी तडजोड करण्यास हरकत नसल्याचा आरोप त्यांनी केला. भारताच्या लोकशाहीच्या निर्मितीत भाजपची भूमिका नव्हती, असा दावाही त्यांनी केला.
