वॉशिंग्टन : अमेरिकेतील ट्रम्प प्रशासनाने ‘स्व-निर्वासन’ मोहिमेअंतर्गत प्रसिद्ध केलेली एक जाहिरात वादाच्या भोवऱ्यात सापडल्यानंतर हटवली आहे. या जाहिरातीमधून शीख समुदायाला लक्ष्य करून कथित वांशिक भेदभाव करण्यात आल्याचा आरोप करण्यात आला होता. भारतीय-अमेरिकन संघटना तसेच डेमोक्रॅटिक पक्षाच्या नेत्यांनी जाहिरातीवर तीव्र आक्षेप घेत तिला ‘वांशिक प्रचार’ असल्याचे म्हटले.
Amaron
अमेरिकेच्या होमलँड सिक्युरिटी विभागाने (DHS) गुरुवारी ही जाहिरात सोशल मीडिया प्लॅटफॉर्म ‘एक्स’वरून हटवली. कृत्रिम बुद्धिमत्तेच्या (AI) मदतीने तयार करण्यात आलेल्या या जाहिरातीत दाढी असलेल्या एका व्यक्तीचे छायाचित्र दाखवण्यात आले होते. त्यावर ‘मिस्टर सिंग, आमच्या रस्त्यांवरून निघा, तुम्हाला वाहन चालवता येत नाही’ अशा आशयाचे वाक्य लिहिले होते. अमेरिकेतील परवान्याशिवाय व्यावसायिक वाहन चालविणाऱ्या चालकांविरोधात DHS कडून सुरू असलेल्या मोहिमेचा हा भाग होता. मात्र, ‘सिंग’ हे आडनाव आणि जाहिरातीतील व्यक्तीचे स्वरूप यामुळे शीख समुदायाला जाणीवपूर्वक लक्ष्य करण्यात आल्याचा आरोप झाला.
जाहिरात हटवल्यानंतर भारतीय वंशाच्या नागरिकांच्या हक्कांसाठी काम करणाऱ्या विविध संघटनांनी या निर्णयाचे स्वागत केले. दरम्यान, DHS ने बेकायदेशीर स्थलांतरितांविरोधातील आपली भूमिका कायम ठेवत गुन्ह्यांच्या आरोपांना सामोरे जाणाऱ्या भारतीय वंशाच्या व्यक्तींबाबतही ‘एक्स’वर पोस्ट करणे सुरू ठेवले. कॅलिफोर्नियाचे गव्हर्नर गॅव्हिन न्यूसम यांनी जाहिरातीचा स्क्रीनशॉट शेअर करत ट्रम्प प्रशासनावर जोरदार टीका केली. ते म्हणाले, “हे अत्यंत घृणास्पद आहे. ट्रम्प सरकार शीख समुदायाला लक्ष्य करणारा वांशिक प्रचार करत आहे.”
यानंतर DHS ने ट्रकचालक हरजिंदर सिंग याच्याशी संबंधित आणखी एक पोस्ट केली. बेकायदेशीर ‘यू-टर्न’ घेतल्यामुळे झालेल्या अपघातात तीन जणांचा मृत्यू झाल्यानंतर हरजिंदर सिंगला गेल्या वर्षी अटक करण्यात आली होती. कॅलिफोर्नियाच्या गव्हर्नरला प्रत्युत्तर देताना DHS ने म्हटले, “गॅव्हिन, तुम्हीच त्याला (हरजिंदर सिंग) व्यावसायिक चालक परवाना (CDL) दिला आणि त्यानंतर त्याने ट्रकच्या धडकेत तीन जणांचा जीव घेतला.” कॅलिफोर्नियाचे सिनेटर अॅडम शिफ यांनीही ट्रम्प प्रशासनावर टीका केली. DHS ची जाहिरात मोहीम ‘द्वेषपूर्ण, लज्जास्पद आणि अमेरिकन मूल्यांच्या विरोधात’ असल्याचे त्यांनी म्हटले.
शिफ यांनी ‘एक्स’वरील पोस्टमध्ये म्हटले की, “प्रशासन आणि DHS आपल्या स्पष्ट पूर्वग्रहांना लपवण्याचाही प्रयत्न करत नाहीत. लोकांची पार्श्वभूमी आणि त्यांच्या दिसण्यावरून लाखो अमेरिकन नागरिकांवर संशय घेतला जात आहे. यावेळी शीख समुदायाला लक्ष्य करण्यात आले आहे.” हिंदू अमेरिकन फाउंडेशन, सिख कोअॅलिशन, हिंदूअॅक्शन आणि कोअॅलिशन ऑफ हिंदूज ऑफ नॉर्थ अमेरिका यांसह अनेक संघटनांनीही या जाहिरातीवर तीव्र नाराजी व्यक्त केली. त्यांनी जाहिरातीला ‘अमेरिकन मूल्यांच्या विरोधातील आणि वांशिक भेदभाव करणारी’ असे संबोधले.
हिंदू अमेरिकन फाउंडेशनने म्हटले की, “सिंग हे हिंदू आहेत, ते शीख आहेत, ते अमेरिकन आहेत आणि ते वाहन चालवतात. DHS कडून करण्यात येत असलेले वांशिक, अमेरिकन मूल्यांच्या विरोधातील आणि भारतीयांविरोधातील प्रोफाइलिंग तसेच ट्रोलिंग हे अत्यंत गंभीर आहे.” या संघटनेने अमेरिकेच्या सहाय्यक अॅटर्नी जनरल हरमीत के. धिल्लों आणि FBI संचालक काश पटेल यांना टॅग करत या पोस्टची चौकशी करण्याची मागणी केली. फेडरल एजन्सीची ही ‘भेदभावपूर्ण’ पोस्ट केवळ राजकीय संदेशापुरती मर्यादित नसल्याचेही संघटनेने म्हटले.
दरम्यान, DHS कडून ‘CBP Home’ कार्यक्रमाच्या प्रचारासाठी मोहीम राबवली जात आहे. या कार्यक्रमांतर्गत अमेरिकेत बेकायदेशीररीत्या किंवा कागदपत्रांशिवाय राहणाऱ्या स्थलांतरितांना स्वेच्छेने अमेरिका सोडण्याची इच्छा नोंदवता येते. DHS च्या माहितीनुसार, स्व-निर्वासनासाठी नोंदणी करणाऱ्या पात्र स्थलांतरितांना प्रवासासाठी मदत तसेच २,६०० अमेरिकी डॉलरपर्यंतचा एक्झिट बोनस मिळू शकतो.
