कोल्हापूर : शासनाच्या किमान आधारभूत किंमत खरेदी योजना पणन हंगाम २०२६-२७ अंतर्गत कोल्हापूर जिल्ह्यात धान (भात) विक्रीसाठी १० ठिकाणी, तर नाचणी विक्रीसाठी ५ ठिकाणी शेतकऱ्यांची ऑनलाईन नोंदणी सुरू करण्यात आली आहे. हंगाम २०२६-२७ साठी शासनाने धानाचा (भात) प्रतिक्विंटल २ हजार ४४१ रुपये, तर नाचणीचा प्रतिक्विंटल ५ हजार २०५ रुपये किमान आधारभूत दर निश्चित केला आहे.
Amaron
या योजनेचा लाभ घेण्यासाठी शेतकऱ्यांनी संबंधित तालुका सहकारी खरेदी-विक्री संघाच्या कार्यालयात जाऊन ऑनलाईन नोंदणी करून घ्यावी. यासाठी आधार कार्डची प्रत, आधार संलग्न बँक खात्याच्या पासबुकची स्वयंस्वाक्षांकित प्रत, पिकपेरा नोंद असलेला अद्ययावत ७/१२ व ८-अ उतारा तसेच ॲग्रीस्टॅक आयडी सादर करणे आवश्यक आहे.
धान (भात) व रागी (नाचणी) उत्पादक शेतकऱ्यांसाठी ऑनलाईन नोंदणीचा कालावधी १ सप्टेंबर ते १५ ऑक्टोबर २०२६ असा आहे. कृषी विभागाकडून कार्यान्वित करण्यात आलेल्या ॲग्रीस्टॅक संकेतस्थळावर शेतकऱ्यांचा Farmer ID देणे बंधनकारक करण्यात आले आहे. त्यामुळे संबंधित शेतकऱ्यांनी विहित कालावधीत आवश्यक कागदपत्रांसह नोंदणी करून हमीभाव योजनेचा लाभ घ्यावा, असे आवाहन महाराष्ट्र राज्य पणन महासंघ मर्यादित, मुंबईचे कोल्हापूर विभागाचे संचालक संदिप नरके व संचालक धनश्रीदेवी घाटगे यांनी केले आहे.
