परदेशी पाहुण्यांचे दिल्लीबाहेर स्वागत करण्याची परंपरा
परराष्ट्रमंत्र्यांना अमेरिकेने मुंबईत बोलावून घेतल्याच्या विरोधकांच्या टीकेवर परराष्ट्र मंत्रालयाचे प्रवक्ते रणधीर जयस्वाल यांनी स्पष्टीकरण दिले. जयशंकर हे १९ आणि २० ऑक्टोबरदरम्यान मुंबईत संयुक्त अरब अमिरातीचे (UAE) उपपंतप्रधान शेख अब्दुल्ला बिन झायेद अल नाह्यान यांचे स्वागत करणार आहेत. त्यानंतर ते अमेरिकेचे परराष्ट्रमंत्री मार्को रुबिओ यांच्याशी चर्चा करतील. तसेच, अमेरिकेच्या स्वातंत्र्याच्या २५० व्या वर्धापनदिनानिमित्त मुंबईत आयोजित कार्यक्रमाला जयशंकर प्रमुख पाहुणे म्हणून उपस्थित राहणार आहेत. या पार्श्वभूमीवर जयस्वाल म्हणाले, “गेल्या दशकभरापासून परदेशी पाहुण्यांचे दिल्लीबाहेर स्वागत करण्याची परंपरा सुरू आहे.”
यासाठी त्यांनी काही उदाहरणेही दिली. पंतप्रधान नरेंद्र मोदी यांनी स्पेनच्या पंतप्रधानांचे वडोदरा येथे, जर्मनीचे चॅन्सलर फ्रेडरिक मर्झ यांचे अहमदाबाद येथे, तर मॉरिशसच्या पंतप्रधानांचे वाराणसी येथे स्वागत केले होते. त्याचप्रमाणे, परराष्ट्रमंत्र्यांनी गोवा येथे शांघाय सहकार्य संघटनेच्या (SCO) परराष्ट्रमंत्र्यांच्या बैठकीचे आयोजन केले होते. गुजरातमधील केवडिया येथे बोत्स्वानाच्या परराष्ट्रमंत्र्यांचे स्वागत करण्यात आले होते, तर अमृतसर येथे ‘हार्ट ऑफ एशिया’ परिषद आयोजित करण्यात आली होती.
भारत-UAE सहकार्याचा आढावा घेणार
संयुक्त अरब अमिरातीच्या पंतप्रधानांच्या भेटीमुळे भारत आणि UAE यांच्यातील व्यापक धोरणात्मक भागीदारीअंतर्गत सहकार्याच्या विविध पैलूंचा आढावा घेण्याची संधी मिळणार असल्याचे जयस्वाल यांनी सांगितले. “दोन्ही देशांचे प्रतिनिधी ऊर्जा, व्यापार, गुंतवणूक, वित्तीय तंत्रज्ञान (फिनटेक), संरक्षण आणि संपर्कव्यवस्था या क्षेत्रांतील उपक्रमांचा आढावा घेतील आणि त्यांना पुढे नेण्यासाठी चर्चा करतील,” असे त्यांनी स्पष्ट केले. याशिवाय, पश्चिम आशियातील परिस्थिती तसेच जागतिक आणि बहुपक्षीय मुद्द्यांवरही सविस्तर चर्चा होणार आहे.
Amaron
भारत-अमेरिका संबंध अधिक दृढ करण्यावर भर
मार्को रुबिओ यांच्या भारत दौऱ्यामुळे भारत आणि अमेरिका यांच्यातील संबंधांचा आढावा घेण्याची तसेच दोन्ही देशांमधील व्यापक जागतिक धोरणात्मक भागीदारी अधिक मजबूत करण्याच्या मार्गांवर चर्चा करण्याची संधी मिळेल, असे परराष्ट्र मंत्रालयाने सांगितले. जयस्वाल यांच्या मते, या चर्चेत ऊर्जा, व्यापार आणि गुंतवणूक, संरक्षण, महत्त्वपूर्ण आणि उदयोन्मुख तंत्रज्ञान तसेच परस्पर हिताच्या अन्य क्षेत्रांतील द्विपक्षीय सहकार्याचा समावेश असेल.
याशिवाय, प्रादेशिक आणि जागतिक घडामोडींवरही दोन्ही देश चर्चा करतील. या भेटीमुळे भारत-अमेरिका यांच्यातील उच्चस्तरीय संवाद कायम ठेवण्यास आणि समान प्राधान्यक्रमांवर पुढे जाण्यास मदत होईल, असे जयस्वाल यांनी नमूद केले. यापूर्वी मे महिन्यात भारत दौऱ्यावर आलेल्या रुबिओ यांनी क्वाड देशांच्या परराष्ट्रमंत्र्यांच्या बैठकीत सहभाग घेतला होता. तसेच, अमेरिकेच्या स्वातंत्र्याच्या २५० व्या वर्धापनदिनानिमित्त त्यांनी नवी दिल्ली येथे स्वागत समारंभाचे आयोजन केले होते.
