मुंबई : राष्ट्रवादी काँग्रेसच्या अजित पवार गटात गेल्या काही दिवसांपासून राजकीय घडामोडींना वेग आला आहे. या पार्श्वभूमीवर पक्षाच्या राष्ट्रीय अध्यक्षा आणि राज्याच्या उपमुख्यमंत्री सुनेत्रा पवार यांनी मंगळवारी पक्षातील सर्व आमदारांची बैठक बोलावली आहे. या बैठकीत कोणता महत्त्वाचा निर्णय घेतला जाणार, याकडे राजकीय वर्तुळाचे लक्ष लागले आहे. सुनेत्रा पवार यांच्या देवगिरी निवासस्थानी मंगळवारी सायंकाळी सात वाजता ही बैठक होणार आहे. त्याआधी आज राष्ट्रवादी काँग्रेसच्या अजित पवार गटाच्या कोअर कमिटीची बैठक आयोजित करण्यात आली आहे. त्यामुळे पक्षातील या बैठकांमधून काय निर्णय समोर येतात, याबाबत उत्सुकता निर्माण झाली आहे.
सुनेत्रा पवारांना डावलून अमित शाहांची भेट घेतल्याची चर्चा
दरम्यान, अजित पवार गटातील काही ज्येष्ठ नेत्यांनी सुनेत्रा पवार यांना वगळून केंद्रीय गृहमंत्री अमित शाह यांची दिल्लीत भेट घेतल्याचे वृत्त समोर आल्यानंतर राजकीय चर्चांना उधाण आले होते. पक्षांतर्गत मतभेद आणि नेतृत्वातील समन्वयावरूनही प्रश्न उपस्थित केले जात होते. या वृत्तावर पक्षाचे राष्ट्रीय मुख्य प्रवक्ते उमेश पाटील यांनी स्पष्टीकरण दिले. काही अदृश्य शक्तींकडून दिल्लीतील भेटीला अनावश्यक राजकीय रंग देऊन पक्षात अंतर्गत मतभेद असल्याचे चित्र निर्माण करण्याचा प्रयत्न केला जात असल्याचा आरोप त्यांनी केला. हे वृत्त म्हणजे खोडसाळपणा असल्याचेही त्यांनी स्पष्ट केले.
सुनेत्रा पवारांनीच दिली होती भेटीची माहिती
उमेश पाटील यांनी दिलेल्या माहितीनुसार, यापूर्वी सुनेत्रा पवार आणि खासदार पार्थ पवार यांनी केंद्रीय गृहमंत्री अमित शाह यांची भेट घेतली होती. दिवंगत अजित पवार यांच्या निधनानंतर पक्षासमोरील विविध प्रश्नांवर या भेटीत सविस्तर चर्चा झाली होती. याच भेटीदरम्यान सुनेत्रा पवार यांनी पक्षातील ज्येष्ठ नेत्यांचे शिष्टमंडळ अमित शाह यांची भेट घेणार असल्याची माहिती त्यांना दिली होती. तसेच या भेटीसाठी वेळ उपलब्ध करून देण्याची विनंतीही त्यांनी केली होती, असे उमेश पाटील यांनी सांगितले. त्यामुळे ज्येष्ठ नेत्यांच्या दिल्ली भेटीवरून सुरू झालेल्या चर्चांच्या पार्श्वभूमीवर मंगळवारी होणाऱ्या आमदारांच्या बैठकीत पक्षाच्या पुढील राजकीय वाटचालीबाबत काही महत्त्वाचे संकेत मिळतात का, याकडे सर्वांचे लक्ष लागले आहे.
