स्थानिक परंपरेला उद्योजकतेची जोड; केकलेच्या महिलांचा अभिनव उपक्रम
कोल्हापूर : सेवा संकल्प अभियानांतर्गत पन्हाळा तालुक्यातील केकले गावातील महिला स्वयंसहायता समूहाने स्थानिक परंपरेला उद्योजकतेची जोड देत अभिनव उपक्रम हाती घेतला आहे. गावात तयार होणाऱ्या आणि श्री क्षेत्र जोतिबाला अर्पण केल्या जाणाऱ्या पारंपरिक दौण्याला आकर्षक पॅकेजिंगद्वारे व्यावसायिक स्वरूप देऊन त्याची श्री क्षेत्र जोतिबा येथे विक्री करण्याचे नियोजन करण्यात आले आहे.
दौण्यापासून सुगंधी अत्तर, अगरबत्ती, साबण आदी मूल्यवर्धित उत्पादने तयार करून त्यांना बाजारपेठ उपलब्ध करून देण्याचा समूहाचा मानस आहे. उत्पादनांचे ब्रँडिंग करण्यासोबतच आवश्यकतेनुसार पेटंट व इतर बौद्धिक संपदा हक्कांची नोंदणी करण्यासाठीही प्रयत्न करण्यात येणार आहेत. या उपक्रमाला बळ देण्यासाठी महाराष्ट्र राज्य ग्रामीण जीवनोन्नती अभियान (उमेद) अंतर्गत उत्पादक गटाच्या माध्यमातून 5 लाख रुपयांचे आर्थिक पाठबळ उपलब्ध करून देण्याचे नियोजन आहे.
यापूर्वी याच महिला समूहाने देशी अंडी संकलन केंद्राचा उपक्रम यशस्वीपणे राबवून महिलांसाठी रोजगाराच्या संधी निर्माण केल्या आहेत. स्थानिक उत्पादनांना बाजारपेठ उपलब्ध करून देत महिलांना आर्थिकदृष्ट्या सक्षम करण्याच्या या उपक्रमाला गटविकास अधिकारी सोनाली माडकर, तालुका अभियान व्यवस्थापक तौमर अल्ताफ मुजावर, प्रभाग समन्वयक माधुरी मोरे, सीआरपी तनिष्का पाटील तसेच ग्रामस्थांचे मार्गदर्शन व सहकार्य लाभत आहे. स्थानिक परंपरा, महिलांची कल्पकता आणि सामूहिक प्रयत्नांच्या माध्यमातून केकले गावातील हा ग्रामीण महिला सक्षमीकरणासह स्थानिक उत्पादनांना व्यावसायिक ओळख मिळवून देणारा ठरत आहे.
