तहकूब सभेनंतर शशिकांत पाटील-चुयेकर यांची ‘गोकुळ’च्या अध्यक्षपदी निवड; १३ संचालकांचा निर्णय

कोल्हापूर : कोल्हापूर जिल्हा सहकारी दूध उत्पादक संघाच्या (गोकुळ) अध्यक्षपदाच्या निवडीवरून गुरुवारी नाट्यमय घडामोडी घडल्या. अध्यक्ष निवडीसाठी आयोजित केलेली सभा तहकूब झाल्यानंतर समविचारी आघाडीच्या १३ संचालकांनी सभागृहातच स्वतंत्र निवड सभा घेत शशिकांत आनंदराव पाटील-चुयेकर यांची अध्यक्षपदी निवड केल्याची घोषणा केली. त्यानंतर कार्यकर्त्यांनी फटाक्यांची आतषबाजी करत आणि पाटील-चुयेकर यांना खांद्यावर उचलून घेत जल्लोष केला.

महायुतीचे १२ संचालक सभेला अनुपस्थित राहणार असल्याचे निश्चित असल्याने काँग्रेसचे संचालक कायदेशीर तयारीनिशी सभेला उपस्थित होते. सभा तहकूब होताच त्यांनी पाटील-चुयेकर यांच्या अध्यक्षपदी निवडीची मागणी केली. मात्र, निवडणूक निर्णय अधिकाऱ्यांनी ही मागणी अमान्य केली. त्यानंतर १३ संचालकांनी सभागृहातच निवड सभा घेत पाटील-चुयेकर यांची अध्यक्षपदी निवड केली. या निवडीबाबत बोलताना शशिकांत पाटील-चुयेकर म्हणाले, “बहुमताने माझी अध्यक्षपदी निवड झाली आहे. जिल्ह्यातील साडेपाच लाख दूध उत्पादकांच्या मनात होते, तेच आज घडले आहे. ही निवड कायदेशीर असून आजपासून माझे कामकाज सुरू झाले आहे. आगामी काळात गोकुळचे घटलेले दूध संकलन वाढविण्यासाठी प्रयत्न करणार आहे.”

तायशेटे सूचक, तर रेडेकर अनुमोदक

शशिकांत पाटील-चुयेकर यांच्या अध्यक्षपदाच्या निवडीसाठी संचालक अभिजीत तायशेटे सूचक होते, तर संचालिका अंजना रेडेकर यांनी अनुमोदन दिले. यावेळी प्रा. किसन चौगले, राजू आवळे, बाबासाहेब देवकर, बाबासाहेब चौगले, बयाजी शेळके, राहुल देसाई, विश्वजीत जाधव, विद्याधर गुरबे, शशिकांत खोत आणि भाग्यश्री डोंगळे हे संचालक उपस्थित होते.

दिवाळीपूर्वी पुन्हा सभा होण्याची शक्यता

गोकुळ दूध संघाची गुरुवारी तहकूब झालेली सभा दिवाळीपूर्वी होण्याची शक्यता आहे. अशासकीय संचालकांबाबत मंत्रिमंडळाच्या बैठकीत निर्णय घेऊन त्यासंदर्भातील राजपत्र तातडीने प्रसिद्ध करण्याच्या हालचाली महायुतीच्या पातळीवर सुरू असल्याचे समजते. मंगळवारी (दि. ३) याबाबत निर्णय होण्याची शक्यता व्यक्त केली जात आहे. त्यामुळे सभेच्या गणपूर्तीवरून (कोरम) निर्माण झालेला पेच आगामी आठवड्यात सुटणार का, याकडे दूध उत्पादकांचे लक्ष लागले आहे.

पोटनियम काय सांगतात?

गोकुळच्या पोटनियमानुसार निवडणुकीचा निकाल जाहीर झाल्यानंतर १५ दिवसांच्या आत अध्यक्ष निवडीची सभा घेणे बंधनकारक आहे. ही मुदत २ नोव्हेंबरला संपत आहे. त्यामुळे अध्यक्ष निवडीच्या प्रक्रियेवरून कायदेशीर पेच निर्माण होण्याची शक्यता असून, याबाबत निवडणूक प्राधिकरण काय निर्णय घेते, याकडे लक्ष लागले आहे.

‘तुमच्या मुलाला चेअरमन करताना मी जातीयवादी नव्हतो का?’ : सतेज पाटील

गोकुळ दूध संघाच्या निवडणुकीत मुलगा नवीद मुश्रीफ यांच्या पराभवासाठी काँग्रेस नेत्याने जातीयवादी प्रचार केल्याचा आरोप वैद्यकीय शिक्षणमंत्री हसन मुश्रीफ यांनी केला होता. या आरोपाला काँग्रेसचे विधानपरिषदेतील गटनेते आमदार सतेज पाटील यांनी गुरुवारी पत्रकार परिषदेत प्रत्युत्तर दिले. “गोकुळच्या अध्यक्षपदासाठी नवीद मुश्रीफ यांचे नाव असलेले पाकीट मी स्वतः विश्वास पाटील यांच्याकडे दिले होते. त्यावेळी मी जातीयवादी नव्हतो का?” असा सवाल सतेज पाटील यांनी केला. कोल्हापूर जिल्ह्यात जातीयवाद केला जात नाही. त्यामुळे आपल्यावर जातीयवादी असल्याचा आरोप होणे दुर्दैवी आहे, असे ते म्हणाले. मुश्रीफ यांना ज्यांनी त्रास दिला, त्यांच्याबाबत ते बोलत नाहीत. त्यांच्या मुलाचा पराभव कोणी घडवून आणला, हेही त्यांना माहिती असल्याचा टोला पाटील यांनी लगावला.

‘माझा मुलगा अध्यक्ष होणार नव्हता’

महायुतीच्या १२ संचालकांपैकी काही जण सभेला उपस्थित राहण्यास तयार होते. मात्र, त्यांचा नेत्यांशी चर्चा करण्याचा आग्रह होता. त्यानुसार आपण कोणताही अहंकार न ठेवता चर्चा केली; परंतु त्यांच्याकडून काहीही प्रतिसाद मिळाला नाही, असे सतेज पाटील यांनी सांगितले. “संचालकांना विनंती करण्यामागे शेतकऱ्यांप्रती असलेली माझी तळमळ होती. गोकुळचा अध्यक्ष माझा मुलगा होणार नव्हता,” असे सांगत त्यांनी मुश्रीफ यांना प्रत्युत्तर दिले.

‘सहकारातील काळा दिवस’

सभेच्या गणपूर्तीसाठी कोरम आवश्यक असतो; मात्र निवड प्रक्रियेसाठी त्याचा वेगळा विचार केला पाहिजे, अशी भूमिका सतेज पाटील यांनी मांडली. गुरुवारी कोरमचा मुद्दा उपस्थित करून सभा तहकूब करणे हा सहकार क्षेत्रातील काळा दिवस असल्याची टीकाही त्यांनी केली.

प्रशासकांच्या काळात २४ कोटींचा तोटा झाल्याचा दावा

गोकुळवर प्रशासक असताना दूध संकलनात घट झाली असून संघाला २४ कोटी रुपयांचा तोटा झाल्याचा दावा सतेज पाटील यांनी केला. आणखी काही दिवस प्रशासक राहिल्यास परिस्थिती काय होईल, असा सवाल करत सत्ताधाऱ्यांना गोकुळ दूध संघ बंद पाडायचा आहे, असा आरोपही त्यांनी केला.