पुणे : कोथरूडमधील नवोदित आणि हौशी कलाकारांना त्यांच्या कलागुणांना वाव देणारे हक्काचे व्यासपीठ मिळावे, या उद्देशाने माझ्या पुढाकारातून सुरू झालेल्या ‘नामदार करंडक’ आंतरसोसायटी एकांकिका स्पर्धेच्या चौथ्या पर्वाची दिमाखदार सांगता झाली. या पर्वातील विजेत्या आणि उत्कृष्ट कलाकारांचा प्रसिद्ध अभिनेते व दिग्दर्शक प्रवीण तरडे, अभिनेत्री स्नेहल तरडे आणि अभिनेते संकर्षण कऱ्हाडे यांच्या उपस्थितीत पुरस्कार देऊन गौरव करण्याचा विशेष आनंद झाला, असे मत भाजपचे नेते, मंत्री चंद्रकांत दादा पाटील यांनी व्यक्त केले.
मंत्री पाटील म्हणाले की, ‘नामदार करंडक’चा वाढता प्रतिसाद हीच या उपक्रमाची खरी ताकद आहे. पहिल्या पर्वात १५, दुसऱ्या पर्वात १८, तर तिसऱ्या पर्वात २५ सोसायट्यांनी सहभाग नोंदवला. पुढील वर्षी ही संख्या ५० सोसायट्यांपर्यंत पोहोचवण्याचा माझा प्रयत्न आहे.याच अनुषंगाने पुढील वर्षी स्पर्धेत सहभागी होणाऱ्या प्रत्येक सोसायटीला ₹२५ हजारांचे पारितोषिक, तर प्रथम क्रमांकाच्या संघाला ₹३ लाखांचे पारितोषिक देण्याची घोषणा केली आहे. कोथरूडच्या कलावंतांना व्यासपीठ आणि त्यांच्या स्वप्नांना बळ देण्याचा हा प्रवास असाच सुरू राहील, असेही मंत्री पाटील यांनी सांगितले.
