मुंबई : दिग्दर्शक नितेश तिवारी यांच्या बहुचर्चित ‘रामायण’ चित्रपटाला बॉक्स ऑफिसवर अपेक्षेप्रमाणे विक्रमी ओपनिंग मिळाले नसले, तरी चित्रपटाने पहिल्या दोन दिवसांत दमदार कमाई केली आहे. रणबीर कपूर, यश आणि साई पल्लवी यांच्या प्रमुख भूमिका असलेल्या या चित्रपटाने भारतात अवघ्या दोन दिवसांत ११२ कोटी रुपयांहून अधिक कमाई केली आहे. विशेष म्हणजे, दिवाळीपूर्वी प्रदर्शित झालेल्या चित्रपटांमध्ये या चित्रपटाने नवा विक्रम नोंदवला आहे. मात्र, दुसऱ्या दिवशी चित्रपटाच्या कमाईत काहीशी घट झाली असून, ‘आदिपुरुष’च्या कमाईचा विक्रम मोडण्यात त्याला अद्याप यश आलेले नाही.
‘रामायण’ची दोन दिवसांतील कमाई किती?
‘रामायण’ने प्रदर्शनाच्या पहिल्याच दिवशी देशभरातील चित्रपटगृहांमध्ये चांगली गर्दी खेचली. पहिल्या दिवशी या चित्रपटाने भारतात ६४.८५ कोटी रुपयांची निव्वळ कमाई केली. चित्रपटाची भव्यता आणि मोठे बजेट लक्षात घेता ही कमाई अपेक्षेपेक्षा कमी मानली जात असली, तरी बॉलीवूडमधील सर्वाधिक ओपनिंग मिळवणाऱ्या चित्रपटांच्या यादीत त्याने चौथे स्थान पटकावले.मात्र, शुक्रवारी दुसऱ्या दिवशी सकाळच्या शोपासून चित्रपटाच्या कमाईचा वेग काहीसा मंदावला. ट्रेड वेबसाइट Sacnilk च्या आकडेवारीनुसार, दुसऱ्या दिवशी चित्रपटाने भारतात ४८.०५ कोटी रुपयांची निव्वळ कमाई केली. त्यामुळे पहिल्या दोन दिवसांतील एकूण कमाई ११२.९० कोटी रुपयांवर पोहोचली आहे.अवघ्या दोन दिवसांत १०० कोटींचा टप्पा पार केल्यामुळे आता दिवाळीच्या सुट्टीतील विकेंडमध्ये चित्रपटाच्या कमाईत पुन्हा वाढ होण्याची निर्मात्यांना अपेक्षा आहे. प्रेक्षकांकडून मिळणारा सकारात्मक प्रतिसाद आणि तोंडी प्रसिद्धीच्या जोरावर चित्रपटाची कमाई वाढते का, हे पाहणे महत्त्वाचे ठरणार आहे.
यशच्या उपस्थितीनंतरही कन्नडमध्ये संथ सुरुवात
चित्रपटाच्या एकूण कमाईत हिंदी आवृत्तीचा मोठा वाटा असल्याचे दिसत आहे. रावणाच्या भूमिकेत अभिनेता यश असूनही कन्नड भाषेतील आवृत्तीला अपेक्षित प्रतिसाद मिळालेला नाही. पहिल्या दिवशी या आवृत्तीने केवळ ७.५० कोटी रुपयांची कमाई केली. दुसऱ्या दिवशीही तिच्या कमाईचा वेग वाढलेला नाही.दुसरीकडे, तेलुगू आवृत्तीने तुलनेने चांगली कामगिरी केली आहे. मात्र, तमिळ आणि मल्याळम आवृत्त्यांना अद्याप विशेष प्रतिसाद मिळालेला नाही. चित्रपटाला मिळणारी सकारात्मक समीक्षकांची मते आणि प्रेक्षकांच्या प्रतिक्रिया यामुळे आगामी दिवसांत चित्रपटगृहांमधील गर्दी वाढेल, अशी निर्मात्यांना अपेक्षा आहे.
‘आदिपुरुष’च्या तुलनेत ‘रामायण’ मागे
पहिल्या दिवसाच्या कमाईत ‘रामायण’ने ‘पठाण’ (५७ कोटी रुपये), ‘ॲनिमल’ (६३ कोटी रुपये) आणि ‘दृश्यम २’ (६२ कोटी रुपये) यांसारख्या गाजलेल्या चित्रपटांना मागे टाकले. मात्र, रणवीर सिंहच्या ‘धुरंधर २’ने नोंदवलेला १०२ कोटी रुपयांच्या ओपनिंगचा विक्रम मोडण्यात त्याला अपयश आले. तसेच प्रभासच्या ‘आदिपुरुष’च्या ८६.७५ कोटी रुपयांच्या पहिल्या दिवसाच्या कमाईलाही ‘रामायण’ मागे टाकू शकला नाही.दुसऱ्या दिवसाच्या कमाईतही हेच चित्र कायम राहिले. ‘आदिपुरुष’ने प्रदर्शनाच्या पहिल्या दोन दिवसांत भारतात १५१ कोटी रुपयांची निव्वळ कमाई केली होती. त्या तुलनेत ‘रामायण’ची दोन दिवसांतील ११२.९० कोटी रुपयांची कमाई कमी आहे. मात्र, या दोन्ही चित्रपटांच्या प्रदर्शनाच्या दिवसांमध्ये महत्त्वाचा फरक आहे. ‘आदिपुरुष’चे पहिले दोन दिवस शुक्रवार आणि शनिवार होते, तर ‘रामायण’चे पहिले दोन दिवस गुरुवार आणि शुक्रवार होते. त्यामुळे ‘रामायण’च्या विकेंडमधील कमाईकडे आता चित्रपटसृष्टीचे लक्ष लागले आहे.
