मुंबई : रॉकिंग स्टार यश पुन्हा एकदा बॉक्स ऑफिसवर दमदार पुनरागमन करताना दिसत आहे. नकारात्मक परीक्षणे, प्रदर्शनाला झालेला विलंब तसेच हिंसक आणि अंतरंग दृश्यांबाबत सुरू असलेल्या चर्चांचा कोणताही परिणाम न होता यशच्या ‘टॉक्सिक’ चित्रपटाने प्रदर्शनाच्या पहिल्याच दिवशी बॉक्स ऑफिसवर जोरदार सुरुवात केली आहे. गीतू मोहनदास दिग्दर्शित हा चित्रपट ओणमच्या सुट्टीच्या पार्श्वभूमीवर बुधवारी चित्रपटगृहांमध्ये प्रदर्शित झाला. पहिल्याच दिवशी चित्रपटाने भारतातील विविध भाषांमध्ये दमदार कमाई करत अनेक विक्रम मोडीत काढले आहेत.
‘टॉक्सिक’कडून देशभरात दमदार ओपनिंगची अपेक्षा आधीपासूनच होती. मात्र, प्रत्यक्षात चित्रपटाने अपेक्षांपेक्षाही वेगाने बॉक्स ऑफिसवर मुसंडी मारली. देशभरातील अनेक चित्रपटगृहांमध्ये पहिल्या दिवसापासूनच हाऊसफुल्लचे चित्र पाहायला मिळाले. Sacnilkच्या माहितीनुसार, प्रदर्शनाच्या दिवशी रात्री ९ वाजेपर्यंत ‘टॉक्सिक’ने भारतात तब्बल ₹१०२ कोटींची नेट कमाई केली होती. यामध्ये हिंदी आवृत्तीचा मोठा वाटा असून हिंदीतून सुमारे ₹६१ कोटींची नेट कमाई झाली आहे. कन्नड आवृत्तीची कमाई तुलनेने कमी असली तरी सकाळच्या शोमध्ये तब्बल ८५ टक्के ऑक्युपन्सी नोंदवण्यात आली. तेलुगू डब आवृत्तीनेही चांगली कामगिरी केली आहे. मात्र, तमिळ आणि मल्याळम आवृत्त्यांची कामगिरी तुलनेने काहीशी मागे आहे.
सकाळच्या शोमध्येच मोडला ‘धुरंधर’चा विक्रम
रणवीर सिंगच्या ‘धुरंधर’ चित्रपटाने गेल्या वर्षी तब्बल ₹१,३०० कोटींची कमाई करत वर्षातील सर्वाधिक कमाई करणाऱ्या भारतीय चित्रपटाचा मान मिळवला होता. डिसेंबरमध्ये प्रदर्शित झालेल्या ‘धुरंधर’ने पहिल्या दिवशी ₹२८ कोटींची नेट कमाई केली होती. मात्र, ‘टॉक्सिक’ने केवळ सकाळच्या शोमधूनच ‘धुरंधर’ची पहिल्या दिवसाची संपूर्ण कमाई मागे टाकली. त्यानंतर दुपारच्या शोपर्यंत ‘पठाण’, ‘अ‍ॅनिमल’ आणि ‘जवान’ यांचे पहिल्या दिवसाचे आकडेही चित्रपटाने मागे टाकले. संध्याकाळपर्यंत ‘कल्की 2898 एडी’ चाही पहिल्या दिवसाचा आकडा ओलांडला. दिवसाच्या अखेरच्या टप्प्यात ‘टॉक्सिक’ने ‘धुरंधर २’च्या ₹२८ कोटींच्या ओपनिंगलाही मागे टाकले. व्यापार विश्लेषकांच्या मते, चित्रपट पहिल्या दिवशी ₹११० कोटींचा टप्पा पार करू शकतो. मात्र, कन्नड चित्रपटसृष्टीतील सर्वकालीन विक्रम असलेल्या ‘KGF Chapter 2’च्या ₹११६ कोटींच्या पहिल्या दिवसाच्या कमाईचा विक्रम मोडण्यात ‘टॉक्सिक’ला अपयश येण्याची शक्यता आहे.
अ‍ॅडव्हान्स बुकिंगलाही मोठा प्रतिसाद
‘टॉक्सिक’च्या अ‍ॅडव्हान्स बुकिंगलाही प्रेक्षकांचा जबरदस्त प्रतिसाद मिळाला. २१ ऑगस्ट रोजी सकाळी ६ वाजता अ‍ॅडव्हान्स बुकिंग सुरू झाले. बुधवारी सकाळपर्यंत पाच दिवसांच्या बुकिंगमध्ये १८ लाखांहून अधिक तिकिटांची विक्री झाली. या अ‍ॅडव्हान्स बुकिंगमधूनच पहिल्या दिवसासाठी जवळपास ₹६० कोटींची कमाई झाली होती. गीतू मोहनदास दिग्दर्शित ‘टॉक्सिक’मध्ये नयनतारा, कियारा अडवाणी, हुमा कुरेशी, रुक्मिणी वसंत आणि तारा सुतारिया यांच्या प्रमुख भूमिका आहेत. हा चित्रपट २६ ऑगस्ट रोजी चित्रपटगृहांमध्ये प्रदर्शित झाला. प्रदर्शनापूर्वीपासूनच चित्रपटातील बोल्ड आणि अंतरंग दृश्यांमुळे ‘टॉक्सिक’ चर्चेत होता. तसेच काही दृश्ये आणि संवादांमधून महिलांचे चित्रण योग्य पद्धतीने करण्यात आले नसल्याची टीकाही झाली. मात्र, केंद्रीय चित्रपट प्रमाणन मंडळाने (CBFC) कोणतीही दृश्ये वगळण्याचे निर्देश न देता चित्रपटाला ‘A’ प्रमाणपत्र दिले आहे.
